Cibiyar lura da ayyukan ‘yan sama jannati ta kasar Sin, ta ce kasar ta yi nasarar noma sama da nau’o’in tsirrai 20, na rukunonin amfanin gona 14, a cibiyarta ta binciken sararin samaniya. Hakan a cewar cibiyar muhimmin jigo ne wanda ya samar da kafar fadada noma amfanin gona mai yawa a cibiyar ta binciken samaniya.
Yayin wani taron karawa juna sani da ya gudana a birnin Tianjin na arewacin kasar Sin, daya daga ‘yan sama jannatin kasar Sin da ya yi aiki a kumbon Shenzhou-21, mai suna Zhang Hongzhang, ya nuna hotuna da faya-fayan bidiyon kyakkyawan lambun dake cibiyar binciken sararin samaniya ta kasar Sin wato Tiangong, lambun dake kunshe da tsirran salak, da karas, da sunflower, da dankali da kuma alkama.
Tun a watan Oktoban shekarar 2021 ne kasar Sin ta fara aikewa da ‘yan sama jannati masu jimawa a samaniya, lokacin da aka harba kumbon Shenzhou-13 dauke da Zhai Zhigang, da Wang Yaping da Ye Guangfu, ‘yan sama jannati uku da suka yi aiki a babban sashen cibiyar binciken samaniya na Tianhe.
Dangane da hakan ne ma kwararre a ayyukan sama jannati na kasar Sin Bian Qiang, ya ce “Jimawa a sararin samaniya na bukatar rage dogaro kan abubuwan bukata da ake aikawa daga doron duniya. Don haka, gwaje-gwajen sarrafa yanayin muhallin halittu don tallafawa rayuwar bil’adama da muke gudanarwa, yake mayar da hankali ga gina tsarin rayuwar halittu mai inganci a samaniya, wanda ka iya samar da damar sake sarrafa ruwa, da iska da abinci, da katse bukatar dogaro kan doron kasa, da samar da isasshen abinci a samaniya.” (Mai fassara: Saminu Alhassan)
