Kasar Sin ta sha alwashin kara karfafa kare muhallin halittu don inganta tsarin rayuwar mabanbantan halittu, karkashin shirin raya kasar na shekaru biyar wanda ke gudana tsakanin shekarar nan ta 2026 zuwa 2030.
A baya bayan nan ne ma’aikatar lura da muhallin halittu da muhalli, da ma’aikatar albarkatun kasa, da sauran hukumomi masu nasaba suka fitar da wani shirin musamman domin cimma wannan buri, tare da fatan ci gaba da ingiza manufar zamanantarwa marar gurbata yanayi.
Kazalika, shirin na da nufin bunkasa ingancin sassan muhallin halittu, da tsarin gudanar mabanbantan halittu, da samar da daidaito da juriya, da kara kyautata kariya ga ingancin muhallin halittun kasar.
Bugu da kari, shirin ya kuma kunshi wasu kudurori na musamman da ake fatan cimma nasararsu, ciki har da tabbatar da fadin yankunan kasar ta Sin da ke karkashin kariya bai gaza kaso 18 bisa dari na jimillar fadin filayen kasar baki daya ba, tare da daga mizanin ingancin muhallin halittun kasar ko EQI zuwa maki 86.5.
Har ila yau, shirin ya tanadi fadada matakan kare ingancin kasa, da ruwa zuwa sama da kaso 74 bisa dari, da fadada yawan yankunan dazuzzukan kasar zuwa kaso 25.8 bisa dari.Kana, an tsara wasu ayyuka na kara inganta yanayin albarkatun muhallin halittu a yankuna, da bunkasa kariya da farfado da muhallin halittu, da karfafa cikakkun matakan kare muhallin halittu. (Mai fassara: Saminu Alhassan)
