A kwanan nan, wakilin kafar CMG ya yi hira da Sodiq Safoev, babban mataimakin shugaban majalisar dattawa ta kasar Uzbekistan, wanda ya zo ziyara a kasar Sin, inda mista Safoev ya ce, kasar Sin ta riga ta zama mai taka muhimmiyar rawa wajen tabbatar da ci gaba mai dorewa a yankin tsakiyar Asiya, gami da kasar Uzbekistan.
A cewar mista Safoev, kasar Sin abokiyar hulda mafi muhimmanci ce ga kasar Uzbekistan a fannin hadin gwiwar tattalin arziki, ganin yadda kamfanonin Sin fiye da 6000 ke zuba jari da raya harkokinsu a Uzbekistan din. Kana wasu kamfanonin kasar Sin suna gudanar da ayyuka masu alaka da makamashin hasken rana, da karfin kadawar iska, wadanda suke da matukar muhimmanci ga yunkurin raya tattalin arzikin kasar Uzbekistan.
Kazalika, wasu kamfanonin Sin suna gudanar da ayyukan gine-gine da inganta harkokin sufuri a Uzbekistan, wanda shi ma yana da ma’anar musamman ta fuskar zamanantar da tattalin arziki, da hadewa da kasuwannin sauran kasashe.
Ban da haka, Sodiq Safoev ya kara da cewa, shugaban kasar Sin Xi Jinping na neman tabbatar da hadin gwiwar mabambantan kasashe, da samun daidaito tsakaninsu, da ikonsu na bai daya na bayyana ra’ayi yayin kulawa da al’amuran duniya, duk da cewa suna da bambanci a fannonin arziki, da fadin kasa, da dai sauransu. Kana shugaba Xi ya yi kira ga kasashen duniya da su yi hadin kai wajen tinkarar matsalolin da suka shafi muhalli, da tattalin arizki, da fama da talauci, da gibin ingancin rayuwa, da dai sauransu. A ganin mista Safoev, wadannan tunani na shugaba Xi na da burgewa sosai. (Bello Wang)
