Dakarun Rundunar Haɗin Gwiwa na Sojin Nijeriya, Operation Whirl Stroke, sun kama mutum biyu da ake zargi da safarar kayayyakin amfani ga ƴan bindiga, da wasu mutum biyu da ake zargi da fashi da makami a jihar Binuwai.
An gudanar da kamen ne a ranar Laraba, 28 ga Oktoba, 2026, a ƙananan hukumomin Katsina-Ala da Ukum, bayan samun bayanan sirri da kuma rahoton fashi da makami.
Muƙaddashin Jami’in Yaɗa Labarai na shalƙwatar rundunar, Laftanar Ahmad Zubairu Zubairu, ya ce dakarun sashi na ɗaya sun kama waɗanda ake zargin masu samar da kayayyakin masarufi ne ga ƴan bindiga a yankin Abaji. An bayyana sunayensu da Tertser Terngu, mai shekara 24, da Aondongu Tersoo, mai shekara 15, waɗanda dukkansu suka fito daga ƙauyen Tersoo.
A cewar sanarwar rundunar, ana zargin mutanen biyu da taimaka wa wani jagoran ƴan bindiga da ke gudanar da ayyukansa a yankin Kogin Yooyo, cikin Ƙaramar Hukumar Katsina-Ala. Rundunar ta ce an tsare su domin gudanar da bincike da kuma ɗaukar matakan da suka dace bisa doka.
A wani sumamen na daban, dakarun da ke sintiri sun samu rahoton wani fashi da makami da ya faru da misalin ƙarfe 2:16 na rana a ƙauyen Jootar, kan hanyar Kyado zuwa Wukari, cikin Ƙaramar Hukumar Ukum. Lokacin da sojojin suka isa wurin, sun tarar da jami’ai masu gadin sa-kai sun riga sun kama wasu mutane biyu da ake zargi da hannu a fashin. An kwato bindiga ƙirar gida, da harsasai bakwai nau’in 7.62mm PKT da almakashi guda.
Kwamandan Operation Whirl Stroke kuma Babban Kwamandan Runduna ta Biyar ta Sojin Ƙasa, Manjo-Janar Moses Gara, ya yaba wa dakarun bisa ƙoƙarinsu.
Ya buƙace su da su ci gaba da yin taka-tsantsan, da amfani da sahihan bayanan sirri da kuma ƙarfafa sintiri domin yaƙi da ayyukan ƴan bindiga da sauran laifuffuka a yankin.
Rundunar ta ce waɗannan sumame na cikin ƙoƙarin da take yi na inganta tsaro a jihar Binuwai.
