Shugaban Ƙasa Bola Ahmed Tinubu ya amince da shigar EFCC cikin sa ido kan yadda jihohi 36 da ƙananan hukumomi 774 na Nijeriya ke amfani da kuɗaɗen da suke samu daga Asusun Tarayya ta hannun Kwamitin Raba Kuɗaɗen Asusun Tarayya (FAAC).
Rahoton da TVC News ta wallafa ranar Alhamis, 29 ga Oktoba, 2026, wanda ya dogara da rahoton jaridar BusinessDay, ya ce matakin na da nufin ƙarfafa gaskiya da riƙon amana, tare da tabbatar da cewa ana amfani da kuɗaɗen gwamnati wajen ayyukan da aka ware su domin gudanarwa.
Rahoton ya bayyana cewa tsarin sa ido da ake shirin aiwatarwa zai ƙunshi bibiyar yadda ake raba kuɗaɗen da kuma yadda ake kashe su, da tantance ayyukan raya ƙasa da aka ce an gudanar da kuɗaɗen gwamnati, da binciken zargin karkatar da kuɗaɗe ko wasu laifukan kuɗi. Haka kuma, ana sa ran za a binciki kwangilolin da ake zargi da rashin bin ƙa’ida, da ma’aikatan bogi da kuma ƙorafe-ƙorafen jama’a kan zargin almundahana.
Rahoton ya ce EFCC za ta yi aiki tare da wasu hukumomin gwamnati, ciki har da Ofishin Babban Akanta na Tarayya, da Ma’aikatar Kuɗi ta Tarayya, da Babban Bankin Nijeriya (CBN) da ICPC. Sai dai rahoton bai bayyana cikakken tsarin aiwatar da matakin ba, tushen dokar da za ta jagorance shi ko lokacin da za a fara shi ba.
Matakin ya zo ne yayin da ake ci gaba da sa ido kan yadda gwamnatocin jihohi da ƙananan hukumomi ke kashe kuɗaɗen da suke samu duk wata. Haka kuma, ya biyo bayan hukuncin Kotun Ƙoli na Yuli 2024, wanda ya tabbatar da haƙƙin ƙananan hukumomi na karɓar kuɗaɗensu kai tsaye daga Asusun Tarayya.
Idan aka aiwatar da tsarin, ana sa ran zai ƙara mai da hankali kan yadda ake amfani da kuɗaɗen bayan an raba su, tare da yiwuwar bincike da gurfanar da waɗanda ake zargi da aikata laifukan kuɗi bisa dokokin da suka dace.
