Fasahar kirkirarriyar basira ta AI na habaka cikin sauri, daga fasahar da ake gwajinta zuwa wadda ake amfani da ita a duniya, yayin da shugabanni a masana’antar ke gabatar da sabbin mafita da AI ta samar ga birane da harkokin kasuwanci da masu sayayya, a babban taron intanet na 25 da ke gudana a birnin Beijing na kasar Sin.
Taron wanda ya fara daga ranar 8 zuwa 10 ga watan Yuli, ya bayyana yadda ake hada tsarin AI mai aiwatar da ayyuka, da tsarin AI mai tunani, da fasahohin kwaikwayo cikin bangarori da suka shafi tafiyar da harkokin birane, da kere-kere a masana’antu, da dillanci, da bayar da hidimomi.
A jawabin da ya gabatar ta bidiyo yayin bude taron, Wu Hequan, malami a kwalejin nazarin aikin injiniya ta kasar Sin, ya ce fasahohin da aka kirkiro ta hanyar AI suna kara inganta ita kanta kafar intanet.
Yayin da tsarin AI mai tunani (language models) ke kara yin fice wajen samar da mafita a bangarori daban-daban, tsarin AI mai gudanar da ayyuka (AI Agents) na aiwatar da ayyukan da aka tsara masa, kuma a nan gaba, fagen dijital zai kara dogaro kan hadin gwiwa tsakanin tsare-tsaren AI masu aiwatar da ayyuka, maimakon masu aiki su kadai. (Fa’iza Mustapha)
