An gudanar da taron kara wa juna sani na kasa da kasa game da mahangar Xi Jinping kan gurguzu mai salon kasar Sin a sabon zamani da kuma muhimmancinta ga duniya, ranar Alhamis a Yinchuan, hedkwatar jihar Ningxia da ke arewa maso yammacin kasar Sin.
A karkashin taken “Hanyar cimma zamanantarwa: Tsaraba daga ra’ayi da ayyukan yaki da talauci na kasar Sin” taron ya tattaro mahalarta sama da 120 daga kasashe sama da 50, ciki har da shugabannin jam’iyyun siyasa na kasashen waje, da jakadun kasashe a kasar Sin, da kwararrun masana da kuma wakilan kafofin watsa labarai.
Mahalarta taron sun taya jam’iyyar Kwaminis ta kasar Sin (JKS) murnar cika shekaru 105 da kafuwa, suna masu cewa tun bayan babban taron JKS karo na 18, karkashin nagartaccen shugabancin Xi Jinping, babban sakataren kwamitin tsakiya na JKS, da kuma jagorancin mahangar Xi Jinping kan gurguzu mai salon kasar Sin a sabon zamani, kasar Sin ta cimma nasarar kafa tarihin kawar da bakin talauci baki daya, wanda hakan ya nuna wani muhimmin ci gaba a bangaren wayewar kan dan’adam.
Sun kuma ce kwarewar kasar Sin ta nuna cewa talauci ba kaddara ce da ba za a iya sauyawa ba, kuma ta samar da kwararan bayanai da gogewa ga kasashe masu tasowa da ke bin irin nasu hanyoyin na zamanantarwa da kuma rage talauci. (Abdulrazaq Yahuza Jere)
