Shugaban Ƙasa Bola Tinubu ya ayyana kwanaki uku na zaman makoki na ƙasa saboda jami’an Rundunar Sojin Sama ta Nijeriya (NAF) da suka rasu a hatsarin jirgin soji a Jihar Ondo.
Ya kuma bayar da umarnin sauke tutocin Nijeriya zuwa rabi a faɗin ƙasar domin girmama jami’an da suka rasa rayukansu.
Jirgin NAF ƙirar ATR-42 ya yi hatsari a kusa da wani sansanin sojin ruwa da ke Igbokoda, Jihar Ondo, yayin da ya taso daga Benin, Jihar Edo, zuwa Legas.
Jirgin yana ɗauke da fasinjoji 25 da ma’aikatan jirgin guda bakwai a lokacin da ya yi hatsari.
Tinubu ya bayyana hatsarin a matsayin babban rashi ga rundunar soji da kuma ƙasar baki ɗaya.
Ya ce ba za a manta da sadaukarwar jami’an tsaron da ke sadaukar da rayukansu wajen kare Nijeriya ba.
Shugaban ya umarci Rundunar Sojin Sama ta gudanar da bincike cikin gaggawa domin gano musabbabin hatsarin da kuma ɗaukar matakan hana faruwar irin wannan abu a nan gaba.
Ya kuma yaba wa rundunar bisa fara aikin neman waɗanda abin ya shafa da ceto su nan take bayan aukuwar hatsarin, tare da miƙa ta’aziyyarsa ga iyalan waɗanda suka rasa rayukansu.
