Shugaban Hukumar Ƙwallon Ƙafa ta Duniya (FIFA), Giovanni Vincenzo Infantino, ya ce Shugaban Amurka, zai halarci wasan ƙarshe na gasar Kofin Duniya ta 2026 tare da bikin miƙa kofin ga ƙasar da ta lashe gasar.
Infantino ya bayyana hakan ne a wata hira da ya yi da tashar Fox Sports.
Ya ce shi da Trump za su kasance tare a lokacin bikin bayar da kofin bayan kammala wasan ƙarshe.
An shirya gudanar da wasan ƙarshe na gasar a ranar 19 ga watan Yuli a filin wasa na MetLife da ke New Jersey, a Amurka.
Daga cikin wasanni 104 da za a buga a gasar, 78 za su gudana ne a Amurka, wanda ya sa ƙasar ta zama cibiyar gasar.
Har yanzu dai Trump bai halarci wani wasan gasar ko ɗaya ba.
Sai dai Andrew Giuliani, wani jami’i a Fadar White House da ke kula da harkokin gasar, ya ce hakan ba yana nufin shugaban ba ya sha’awar gasar ba ne, illa dai yawan ayyukan da yake gudanarwa.
