Wani gidan adana kayayyakin tarihi na kasar Sin ya fitar da rahoto mai kunshe da cikakkun bayanai, game da yadda dakarun kasar Japan suka aikata muggana laifukan da suka shafi zubawa jama’a jinin dabbobi a cikin jikinsu, a matsayin wata hanyar gwaje-gwaje yayin da suka kaddamar da mamaya a kasar Sin a lokacin yakin duniya na biyu.
Rahoton wanda aka fitar a ranar Talata, wanda aka adana a babban zauren adana kundayen tattara shaidu na laifukan da tawaga ta 731 ta dakarun na Japan suka aikata, wanda wani soja kuma likitan fida na Japan mai suna Tsutomu Saito ya rubuta, ya tabbatar da yadda a shekarar 1938, dakarun sojin kasar Japan suka yi amfani da karfi wajen durawa wasu fursunonin yaki su 23 jinin dabbobi irinsu dawaki, da tumaki, da karnuka, da zomaye da kaji.
A cewar Jin Shicheng, wani mai bincike dake aiki a babban zauren adana kundayen tattara shaidun, rahoton aikata wannan ta’asa ta zubawa bil’adama jinin dabbobi dan gwajin hana zubar jini mai tsanani, an wallafa shi ne a cikin wata mujallar kiwon lafiya ta sojojin Japan a ranar daya ga watan Agustan shekarar 1940, bayan da aka gabatar da sakamakon binciken ga wani taron karawa juna sani na rundunar sojojin kasar ta Japan a watan Maris na shekarar.
Kazalika, mujallar ta kunshi wasu makaloli 187 na manyan membobin tawagar dakarun mai lamba 731, irinsu Shiro Ishii da Masaji Kitano, dangane da gwaje-gwajen amfani da kwayoyin cuta dangin bakteriya kan bil’adama a yayin yaki. (Saminu Alhassan)
