Shugaban kasar Sin Xi Jinping ya amsa sakon abokai na jihar Iowa ta Amurka tare da aika musu katin gaisuwar sabuwar shekara da fatan alheri, yana cewa ba tare da la’akari da yadda yanayi zai sauya a nan gaba ba, muradin al’ummomin Sin da Amurka na musaya da hadin gwiwa ba zai sauya ba.
Xi Jinping ya ce fatan dangantakar Sin da Amurka na wajen jama’arsu, tubalin ta kuma na cikin al’ummomi, kana makomarta ta dogara kan matasa, kuzarinta kuma na cikin musaya tsakanin kasashensu a matakai daban-daban, yana cewa, alakar fahimtar juna da kauna dake tsakanin matasan kasashen biyu ba za ta sauya ba.
Shugaban na Sin ya bayyana fatan wadannan abokai za su ci gaba da jajircewa wajen bunkasa abota tsakanin jama’ar kasashen biyu da karfafawa karin matasa gadon abotar dake tsakanin Sin da Amurka domin inganta zaman lafiya da aminci ta yadda za su bayar da karin gudunmuwa wajen raya huldar kasashen biyu.
Da farko, Luca Berrone ya rubuta wasika a madadin abokai na Iowa, yana mika sakon gaisuwar sabuwar shekara ga shugaba Xi da uwargidansa Peng Liyuan. A cikin wasikar, Luca Barrone ya ce abokan Iowa za su ci gaba da kaunar dangantakarsu da al’ummar Sin, da ma ci gaba da rayata. (FMM)
