Jam’iyyar ADC ta ɓoye wajen da za ta gudanar da gangamin yaƙin neman zaɓen shugaban ƙasa a Jihar Sakkwato saboda fargabar yiwuwar kawo cikas ga taron.
An shirya fara gangamin ne a ranar Laraba, 4 ga watan Nuwamba, 2026, a daidai lokacin da ake samun takun-saka tsakanin jam’iyyar da Gwamnatin Jihar Sakkwato.
Mai magana da yawun kwamitin yaƙin neman zaɓen ADC, Dahiru Maishanu, ya ce jam’iyyar ta samu wajen gudanar da taron, amma tana jiran amincewar hedikwatarta ta ƙasa kafin bayyana wajen.
Ya ƙara da cewa jam’iyyar ta tuntuɓi ’yansanda da Hukumar Tsaro ta Farin Kaya (DSS) kan rahotannin shirin kawo cikas ga taron.
Ya ce hukumomin sun yi alƙawarin samar da isasshen tsaro.
A nasa ɓangaren, ɗan takarar shugaban ƙasa na ADC, Atiku Abubakar, ya zargi DSS da Gwamnatin Jihar Sakkwato da ƙoƙarin kawo cikas ga gangamin.
Ya yi zargin cewa ana haɗa wasu masu zanga-zanga ne domin haddasa tarzoma, lamarin da ka iya bai wa gwamnati damar sanya dokar hana fita.
Sai dai DSS ta musanta zargin, amma ta ce Darakta Janar na hukumar ya bayar da umarnin gudanar da bincike kan lamarin.
Gwamnatin Jihar Sakkwato ta kare matakin rufe ofishin ADC, inda ta ce hakan ya zama dole domin hana sake ɓarkewar rikici bayan arangama tsakanin magoya bayan ADC da PDP.
Sai dai ADC ta dage cewa za ta gudanar da gangamin kamar yadda aka tsara, tare da gargaɗin gwamnati kan katsalandan a harkokin siyasar jam’iyyar.
