Wani masunci kuma mahaifin ƴaƴa huɗu mai suna Ibrahim Abubakar, ya bayyana yadda wasu ƴan bindiga suka datse masa yatsu biyu a yayin da yake ƙoƙarin tserewa don tsirar da ransa a lokacin wani hari a garin Maraban Jos da ke Jihar Kaduna.
Abubakar ya bayyana halin da yake ciki a ranar Talata, 20 ga watan Oktoba, 2026, inda ya bayyana cewa maharan sun kai harin ne tsakanin ƙarfe 1:00 zuwa 2:00 na daren ranar 9 ga watan Agusta, 2026.
Da yake bayyana yadda lamarin ya auku, masuncin ya ce ƴan bindigar sun kutsa kai cikin garin ne domin yin fashi da kwashe kayan al’umma.
Ya ce ya farka daga barci cikin firgici ya fara ranta a na kare, amma maharan suka tare shi tare da datse masa yatsu biyu a hannunsa kafin ya samu nasarar kuɓucewa, lamarin da ya bar shi cikin mawuyacin hali da zubar da jini.
Wannan mummunan rauni ya jefa rayuwar Abubakar cikin ƙalubale, musamman yadda ya gaza ci gaba da aikin kamun kifi da ya dogara da shi domin ciyar da kansa da iyalinsa. Ya bayyana cewa yana cikin matsanancin damuwa da ciwo, tare da fuskantar cikas wajen ɗaukar dawainiyar ƴaƴansa huɗu tun bayan aukuwar wannan harin.
Abubakar ya yi kira ga gwamnati, ƙungiyoyin agaji, da sauran al’umma masu hannu da shuni da su tallafa masa da kuɗin magani domin samun cikakkiyar kulawar asibiti.
Wannan lamari ya sake fito da irin halin ƙuncin da hare-haren ƴan bindiga ke jefa talakawan karkara a Jihar Kaduna, waɗanda ke ci gaba da fuskantar barazana a rayuwarsu da harkokin neman abinci.
