Akalla mutane huɗu, ciki har da wani fasto, sun mutu bayan wasu mahara da ake zargin makiyaya ne ɗauke da makamai sun kai hari a al’ummar Abeda Shitile da ke Unguwar Gaambe-Tiev, Ƙaramar Hukumar Logo ta Jihar Binuwai. Haka kuma, wasu mutane takwas sun jikkata a harin.
Harin ya faru ne da misalin ƙarfe 5:00 na yamma ranar Talata, lokacin da ƴan kasuwa da sauran mazauna yankin ke shirin rufe kasuwa. Wani mazaunin yankin mai suna Andy ya shaida wa jaridar Punch cewa maharan sun shafe sama da sa’o’i biyu suna harbe-harbe, suna ratsa wurare daban-daban na al’ummar tare da tilasta wa jama’a tserewa domin tsira da rayukansu.
An bayyana sunayen waɗanda suka mutu da cewa Msoo Chan, da Fasto Terungwa Tyonungo, da Suurshater Iornumbe da Dodo Shingir. An kwashe gawarwakinsu zuwa ɗakin ajiyar gawa da ke yankin, yayin da waɗanda suka jikkata ke samun kulawar lafiya.
Mutane takwas da aka ce sun jikkata su ne Kumater Awua, da Miracle Gangera, da Tsetim Terungwa, da Iortyom Helen, da Seember Aondongu, da Kofi Aondosoo, da Chuku Okoro da Orker Iortyom. Sai dai Kakakin Rundunar Ƴansandan Jihar Binuwai, DSP Peter Aondongu, ya bayar da adadin daban, inda ya ce mutane uku ne suka mutu, yayin da wasu biyu ke jinya bayan da farko aka kai mutum biyar asibiti.
Wannan hari ya ƙara jawo damuwa kan matsalar tsaro a Ƙaramar Hukumar Logo, wadda ta sha fuskantar hare-hare a baya. Har zuwa lokacin wallafa rahoton, Ƴansanda ba su bayyana cikakken bayani kan waɗanda suka kai harin ko kuma dalilinsa ba.
