‘yan uwa guda biyu sun rasu a cikin wani ramin masai a jihar Kano.
Wadanda suka rasun, Musa Abdullahi da Rabiu Abdullahi, masu shekaru 27 da 17, an tabbatar da mutuwarsu ne a ranar Asabar.
Jami’in Hulda da Jama’a na Hukumar Kashe Gobara ta Jihar Kano, Saminu Abdullahi, wanda ya tabbatar da faruwar lamarin a ranar Litinin din da ta gabata ta hanyar wata sanarwa da ya rabawa manema labarai, ya ce hukumar ta samu kiran gaggawa daga wani mai suna ‘Na Musa Abdullahi sir Muhd’ cewa wasu masu kwashe masai sun makale acikin ramin masai yayin da suke kokarin kwashe wa.
“A ranar Asabar, 21 ga watan Janairu, 2023, hukumar kashe gobara ta jihar ta samu kiran gaggawa da misalin karfe 8:41 na yamma daga Na Musa Abdullahi sir Muhammad.
“Na musa, Wanda ya bayar da rahoton afkuwar lamari a kasuwar Sabon Gari, Layin Abacha, cikin karamar hukumar Fagge, a lokacin da jami’an mu suka isa wurin, da misalin karfe 8:47 na yamma, sai suka gano cewa wasu ‘yan uwa biyu sun makale acikin wani ramin masai mai zurfi sosai.”
Musa Abdullahi dan kimanin shekaru 27 shine ya fara makale wa a ciki sai kaninsa Rabi’u Abdullahi dan kimanin shekara 17 ya yi yunkurin ceto yayansa amma sai lamarin ya cutura, shima kaddara ta afka masa.
