A wurin babban taron fasahar kirkirarriyar basira (AI) na duniya na shekarar 2026, da taron manyan jami’ai kan tafiyar da sha’anin AI a duniya, kasar Sin ta gabatar da kudurinta game da kula da sha’anin AI wanda shi ne: kiyaye tsarin da zai fifita jama’a kan komai, da tabbatar da cewa ana amfani da AI ta hanyar da ta dace, ta yadda za ta kasance muhimmiyar hanyar samar da wadata da tsaro na bai-daya, tare da yin aiki tare wajen gina tsarin tafiyar da sha’anin AI bisa adalci da daidaito a duniya.
Wannan kuduri ba wai kawai zai cike gibin mallakar fasahohi ba ne, har ma da takaita tazarar da ke tsakanin sauyin fasaha da ake samu cikin sauri da kuma bukatar cimma matsaya kan tafiyar da sha’anin cikin hanzari.
Wani bincike ta shafin intanet da CGTN ta gudanar a duniya ya nuna cewa kashi 85.4% na masu bayyana ra’ayoyi sun yi amannar cewa bunkasar da AI ke yi cikin hanzari tana haifar da sabbin kalubale ga tsaro da gudanar da shugabanci a duniya.
Binciken ya kuma gano cewa kashi 82.6% na masu bayyana ra’ayoyi sun yi imanin cewa ya kamata kasashen da ke samun ci gaba da kuma kasashe masu tasowa su taka rawar gani wajen tsara ka’idojin tafiyar da sha’anin AI domin tabbatar da tsarin ya kasance mai adalci da ya kunshi kowa da kowa.
A wani bangaren kuma, kashi 87.5% na masu bayyana ra’ayoyin sun yi fatan kasashen duniya za su yi aiki kafada-da-kafada wajen karfafa samun fasahar AI cikin sauki da zai kasance ga kowa da kowa, da kuma hana fasahar zamani zama wani sabon karfi na kawo rashin daidaito. (Abdulrazaq Yahuza Jere)
