Uganda na shirin shiga jerin ƙasashen Afirka masu fitar da ɗanyen man fetur zuwa kasuwannin duniya, inda ake sa ran za ta fara jigilar ɗanyen man Pearl Sweet zuwa ƙasashen waje a watan Disamba na 2026.
A matakin farko, man zai fito ne daga rijiyar Kingfisher, wadda kamfanin CNOOC ke sarrafawa, kuma ana sa ran samar da ganga 25,000 a rana daga Disamba, kafin adadin ya haura zuwa ganga 40,000 a rana cikin watanni shida.
Haka kuma, babban aikin Tilenga, wanda kamfanin TotalEnergies ke jagoranta, ana sa ran zai fara samar da mai a zangon farko na shekarar 2027. Idan ayyukan biyu suka kai cikakken ƙarfinsu, Uganda na sa ran samar da kusan ganga 230,000 na ɗanyen mai a rana.
Za a riƙa jigilar ɗanyen man ta bututun East African Crude Oil Pipeline (EACOP) mai tsawon kilomita 1,500 zuwa tashar Tanga a Tanzania. Bututun, wanda darajarsa ta kai dala biliyan 5.6, an tsara shi ne domin jigilar ɗanyen man Uganda zuwa kasuwannin duniya.
Uganda ta zaɓi kamfanin Vitol Group domin tallata man a kasuwannin duniya. Sai dai aikin EACOP ya fuskanci suka ɗaga wasu manoma, ƙungiyoyin kare muhalli da kare haƙƙin bil’adama, waɗanda ke nuna damuwa kan tasirinsa ga ruwa, da namun daji, da muhalli da al’ummomin da ke kusa da bututun.
