Majalisar Masarautar Zazzau ta bayyana cewa Sarkin Yaƙin Zazzau, Alhaji Rilwan Yahaya Pate, ya faɗi a wani taro da yake halarta sannan daga bisani aka tabbatar da rasuwarsa a Asibitin Gambo Sawaba da ke ƙofar Gayan a Zariya, Jihar Kaduna a ranar Alhamis.
Alhaji Pate, wanda hakimi ne a Masarautar Zazzau, yana halartar taron tare da Mai Martaba Sarkin Zazzau, Malam Ahmed Nuhu Bamalli, lokacin da ya faɗi. An garzaya da shi asibiti, amma duk da ƙoƙarin da aka yi na cetonsa ba a yi nasara ba.
- Kotu Ta Ci Tarar ‘Yansanda Naira Miliyan 300 Kan Kisan ‘Yan Shi’a A Zariya
- Mutane 9 Sun Rasu, 3 Sun Jikkata A Hatsarin Mota A Titin Kano-Zariya
Jami’in hulɗa da jama’a na masarautar Zazzau, Abdullahi Aliyu Kwarbai, ya tabbatar da rasuwar Hakimin, yana mai cewa ya rasu ne yayin da yake halartar wani taro da Sarkin Zazzau, bayan an garzaya da shi a Asibitin Gambo Sawaba.
An yi jana’izar marigayin bisa koyarwar addinin Musulunci a Rimin Dodo da yammacin Alhamis. Mai Martaba Sarkin Zazzau ya bayyana rasuwarsa a matsayin “ikon Allah,” yana mai cewa ya kasance shugaba mai kishi da riƙon amana, kuma da wuya a maye gurbinsa.
Sarkin ya yi addu’a Allah ya jiƙansa, ya gafarta masa, kuma ya bai wa iyalansa haƙuri.
