Hukumar hana sha da fataucin miyagun ƙwayoyi ta ƙasa (NDLEA), reshen Jihar Abiya, ta gargaɗi masu amfani da babur mai ƙafa uku (Keke Napep), kan shan miyagun ƙwayoyi, domin tabbatar da gudanar da ayyukansu cikin aminci.
Kwamandan hukumar na jihar, Chilee Chigbu ne ya bayyana hakan a wani taron yini ɗaya da aka yi wa masu sana’ar, ƙarƙashin ƙungiyar masu sarrafa Keke Napep ɗin ta jihar (ASTOPU), shiyyar Aba.
Taron, wanda ya samu wakilcin mataimakin kwamandan kula da wayar da kan jama’a da horarwa, Frank Nwohanmuo, ya ƙara da cewa; taron na da matuƙar muhimmanci, wanda kuma aka gudanar da shi a kan lokaci.
Da yake jawabi yayin ƙaddamar da taron ƙarawa juna sani, kwamishinan sufuri na jihar, Chimezie Ukaegbu, ya buƙaci masu gudanar da sana’ar da su riƙa bin ƙa’idojin zirga-zirgar ababen hawa da kuma hanyoyin tuƙi bisa doka da oda.
Ya kuma umarci masu gudanar da taron, da su yi amfani da a matsayin wata dama, wadda za ta taimaka musu, don samun ilimin ceton rai da inganta ƙwarewarsu ta sana’a, maimakon motsa jiki na yau da kullum.
Wanda ya samu wakilcin babban mataimaki na musamman ga gwamnan jihar kan harkokin sufuri, Obioma Nwogbe, ya bayyana cewa; gwamnati mai ci a jihar, a shirye take domin gudanar da ayyuka masu inganci.
Ya bayyana cewa, don cimma manufofin taron, haɗin kan masu sufurin jiragen sama, ƙungiyoyin ƙwadago, hukumomi da sauran masu ruwa da tsaki na da matuƙar muhimmanci.
Kwamishinan ya jaddada ƙudirin gwamnatin, na gina tsarin sufuri na zamani mai aminci da inganci a jihar.
Kwamandan sashin kiyaye haɗurra na tarayya da ke Aba, Uduma Uduma ya buƙaci masu sana’ar, da su kula da kekunansu da kyau, su kiyaye ƙa’idojin zirga-zirga, domin inganta tuƙinsu.
Tun da farko, shugaban shiyyar, Ɓictor Azubuike, ya bayyana cewa; an shirya taron ne domin wayar da kansu, kan wajibcin tabbatar da tsaro.
Azubuike ya ce, ana sa ran ma’aikatan za su san yadda za su bi ƙa’idojin zirga-zirga, sarrafa kuɗaɗensu da kuma kula da lafiyarsu yadda ya kamata.
