Ɗan Majalisar Wakilai Mai Wakiltar Mazaɓar Tarayya Ta Kiru/Bebeji A Majalisar Wakilai, Hon. Abdulmumin Jibrin Ƙofa, ya sauya sheƙa zuwa Jam’iyyar APC a hukumance, watanni biyu bayan korarsa daga Jam’iyyar NNPP.
An kori Ƙofa ne daga Jam’iyyar NNPP saboda zargin ayyukan zagon ƙasa da rashin biyan kuɗin zama ɗan jam’iyyar.
- Mabiya Mazhabar Shi’a Sun Yi Zanga-Zanga A Kano Kan Barazanar Trump Ga Nijeriya
- Sojoji Sun Fatattaki Boko Haram, Sun Ceto Mutane 86 Da Aka Sace A Borno
Rashin jin ta bakin Ƙofa tun a lokacin ya haifar da cece-ku-ce game da matakinsa na siyasa na gaba, musamman ganin kusancinsa da Shugaba Bola Tinubu.
Da yake sanar da sauya sheƙarsa a ranar Litinin ta hanyar shafukansa na sada zumunta da aka tabbatar, Jibrin ya ce magoya bayansa sun yanke shawarar barin jam’iyyar NNPP da kuma kungiyar Kwankwasiyya don shiga APC da kuma yin aiki tuƙuru don marawa Shugaba Tinubu baya a zaɓen 2027.
“A yau, a cikin nuna goyon baya, dubban ‘yan mazaɓarmu a garinmu na Ƙofa, Bebeji, Kano sun yi min maraba sosai. Taron ya tabbatar barinmu jam’iyyar NNPP/Kwankwasiyya, zuwa APC, da kuma goyon bayan Shugaba Bola Ahmed Tinubu a karo na biyu a kan mulki,” in ji Jibrin.
