Mai magana da yawun kwamitin yakin neman zaben Atiku da Okowa Sanata Dino Melaye, ya mayar da martani akan goyon bayan da tsohon shugaban kasa Cif Olusegun Obasanjo ya yiwa dan takarar shugaban kasa a jamiyyar (LP) Peter Obi.
Jaridar LEADERSHIP ta ruwaito cewa, Obasanjo ya ayyana goyon bayan na sa ne ga Obi a ranar jajibirin shiga sabuwar shekara, kafin zuwan zaben na shugaban kasa da za a gudanar a ranar 25 ga watan Fabirairun 2023.
A cewar Dino ina mai fatan Allah ya bar Obasanjo a raye domin ya gane wa idonsa yadda za a rantsar da Atiku Abubakar a matsayin shugaban kasa a 2023.
Sanatan wanda ya bayyana hakan a kafarsa ta sada zumunta a jiya litinin ya ce, ina mai fatan Allah ya bar Obasanjo a raye a shekarar 2023 don ya halarci taron majisar zartar wa ta kasa a karkashin shugabancin shugaban kasa dan PDP Atiku Abubakar kuma kwamandan askarorin sojin kasar nan.
