Daraktan Yaƙin Neman Zaɓen shugaban ƙasa na jam’iyyar Nigeria Democratic Congress (NDC), Ibrahim Hussain Abdulkarim, ya buƙaci tsohon Mataimakin Shugaban Ƙasa, Atiku Abubakar, da ya haɗa kai da Peter Obi da Rabiu Musa Kwankwaso domin ƙarfafa haɗin kan ’yan adawa gabanin zaɓen shugaban ƙasa na 2027.
Abdulkarim ya yi wannan kira ne a wata hira da gidan talabijin na Arise, inda ya ce haɗin kan ’yan adawa zai ƙara musu damar samun nasara a zaɓen mai zuwa.
Ya bayyana cewa tuni Obi da Kwankwaso suka amince su yi aiki tare a ƙarƙashin NDC, yana mai cewa ƙofar jam’iyyar a buɗe take ga Atiku da sauran ’yan siyasa da ke son shiga haɗin gwiwar.
A cewarsa, ba lallai ne haɗin kan ’yan adawa ya gudana ƙarƙashin jam’iyyar African Democratic Congress (ADC) ba, domin ana iya cimma hakan a ƙarƙashin NDC.
Abdulkarim ya ce abin da suke nema shi ne sauran shugabannin ’yan adawa su haɗa kai da su domin faɗaɗa goyon bayan da suke da shi a faɗin ƙasar.
Ya kuma yi watsi da sukar da ake yi wa tsarin yaƙin neman zaɓen NDC, yana mai cewa bai kamata a kwatanta jam’iyyar siyasa da ƙungiyoyin magoya baya ba. Ya ce NDC na da ƙungiyoyin goyon baya sama da 1,000.
Bugu da ƙari, Abdulkarim ya yi kira ga ’yan Nijeriya da ke fargabar za a iya murɗe sakamakon zaɓe da su shiga NDC. Ya ce jam’iyyar za ta yi kamfen cikin lumana tare da ƙoƙarin tabbatar da cewa an kare ƙuri’un masu zaɓe.
NDC ta riga ta bayyana Obi a matsayin ɗan takararta na shugaban ƙasa, yayin da Kwankwaso zai tsaya takarar mataimakin shugaban ƙasa a zaɓen 2027.
