Ɗan takarar mataimakin shugaban ƙasa na jam’iyyar Nigeria Democratic Congress (NDC), Sanata Rabiu Musa Kwankwaso, ya ce jam’iyyar za ta yi duk mai yiwuwa domin rage farashin man fetur a Nijeriya, ciki har da dawo da tallafin man fetur idan ta yi nasara a zaɓen shugaban ƙasa na 2027.
Kwankwaso, tsohon gwamnan Jihar Kano, ya bayyana hakan ne ranar Alhamis yayin wata hira da gidan talabijin na Channels TV a shirin Politics Today, inda ya nuna damuwa kan yadda cire tallafin man fetur ya jefa ’yan Nijeriya cikin matsin tattalin arziki.
Ya ce har yanzu ’yan Nijeriya ba su farfaɗo daga girgizar tattalin arzikin da cire tallafin ya haifar ba, musamman saboda tsadar makamashi da hauhawar kuɗin sufuri da sauran kayayyakin masarufi.
A cewarsa, matsayar jam’iyyar NDC ita ce, dole ne a ɗauki matakan da za su rage wa al’umma nauyin tsadar rayuwa.
Kwankwaso ya ce: “Matsayar da muka cimma a yanzu ita ce farashin makamashi a wannan ƙasa ya yi yawa.”
Ya ƙara da cewa jam’iyyar za ta yi duk abin da ya dace domin rage farashin man fetur, har da sake duba batun dawo da tallafin.
Ya ce: “Matsayinmu shi ne za mu yi duk abin da ya dace domin tabbatar da cewa an rage farashin man fetur a ƙasar nan, ciki har da yin duk abin da za mu iya, har da batun tallafi.”
Tsohon gwamnan ya bayyana cewa jam’iyyar ta tattauna kan matsalolin tattalin arzikin ƙasar, tare da yin la’akari da ƙwarewar manyan jagororinta, ciki har da ɗan takararta na shugaban ƙasa, Peter Obi, da tsohon gwamnan Jihar Bayelsa, Seriake Dickson.
Ya ce suna da ra’ayin cewa ya kamata a nemo hanyoyin da za su rage wa ’yan Nijeriya wahalhalun rayuwa.
Kwankwaso ya kuma nuna cewa ya kamata a magance cin hanci da rashawa a masana’antar man fetur domin taimakawa wajen rage farashin makamashi.
Shugaban Ƙasa Bola Ahmed Tinubu ne ya sanar da cire tallafin man fetur a ranar 29 ga Mayun 2023, lokacin da ya karɓi ragamar mulkin Nijeriya.
Matakin ya haifar da ƙarin farashin man fetur da tsadar sufuri, tare da ƙara tsadar kayayyaki da ayyuka a sassa daban-daban na ƙasar.
Bayanin Kwankwaso na zuwa ne yayin da jam’iyyun siyasa ke fara bayyana manufofinsu na tattalin arziki gabanin zaɓen shugaban ƙasa na 2027.
