Kwanan baya, kamfanonin motoci na kasar Sin da dama sun gabatar da bayanan yawan motocin da suka sayar a watan Maris na bana, inda bayanan suka nuna cewa, adadin motocin da suka sayar a kasashen waje ya karu kamar yadda ake fatan gani.
Kamar kamfanin BYD, adadin motoci masu daukar fasinjoji da motoci masu daukar kayayyaki da ya sayar a kasashen waje ya kai 119,591 a watan Maris, adadin da ya karu da kaso 65.2 bisa dari. Kana, yawan motocin da kamfanin CHERY ya sayar a kasashen waje ya kai kimanin dubu 150, adadin da ya karu da kaso 72 bisa dari, inda hakan ya kai matsayin koli ta fuskar adadin motocin da wani kamfanin motoci na kasar Sin ya sayar a kasuwannin ketare cikin wata daya. Ban da haka kuma, yawan motocin da kamfanonin Geely Auto, da Chongqing Changan, da kuma kamfanin motoci na Guangzhou da dai sauransu suka sayar a kasashen ketare ya kai matsayin koli a watan Maris.
Kungiyar masana’antun motoci ta kasar Sin ta bayyana cewa, a halin yanzu, motoci kirar kasar Sin suna ci gaba da samun karbuwa daga wajen al’ummomin wasu kasashen duniya, sakamakon ingancinsu, da fasahohin lantarki na zamani, da fasahar AI da ake saka musu. (Mai Fassara: Maryam Yang)
Discussion about this post