Kungiyar kwallon kafa ta Arsenal na dab da sayar da dan wasan gabanta Gabriel Martinelli ga kungiyar Al-Hilal dake buga gasar kwallon kafa ta kasar Saudiyya, idan haka ta tabbata Martinelli zai zama dan wasa mafi tsada da Arsenal din ta taba sayarwa, ana saran darajar Martinelli zata iya kaiwa kusan fam miliyan 60, wannan ne dan wasa na shida da Arsenal din zata rabu dashi a wannan kakar ta bana.
Kwararren mai sharhi akan wasannni Fabrizio Romano ne ya bayyana hakan a shafinsa na X, inda ya rubuta cewa “Al Hilal ta tuntubi kungiyar Arsenal akan yiwuwar daukar dan wasan na kasar Brazil kafin a rufe kasuwar saye da sayarwar ‘yan wasa a karshen wannan watan na Agusta da muke ciki.
Martinelli ya bayyana sha’awar karbar tayin daga kungiyar ta kasar Saudiyya duba da cewar baya cikin yan wasan da kocin Arsenal Mikel Arteta yayi amfani dasu a wasan farko na gasar Premier League ta bana da suka doke Coventry City.
Tun bayan zuwan dan wasan kasar Scotland Christos Tzolis daga Club Brugge ta kasar Belgium kocin ya yanke shawarar sallamar Leandro Trossard da Gabriel Martinelli daga kungiyar, akwai rade-radin dake cewa kungiyar na kokarin ganin ta dauko dan wasan gaban Athletico Madrid Julian Alvarez domin sake karfafa yan wasan gabanta.
