Kungiyar Kananan Hukumomin Nijeriya (ALGON) reshen Jihar Kaduna, ta mika sakon taya murna ga Gwamnan Jihar Kaduna, Sanata Uba Sani, bisa lambar karramawa ta CON da shugaban kasa ya yi masa ado da ita, wacce ke matsayin wata alamar girmamawa a Jamhuriyyar Nijeriya ta Hudu.
Wannan karramawar, wata alama ce a sarari ga sadaukarwar mai girma gwamna, da gagarumin nasarorin da ya samu a hukumance, da kuma jagoranci mai tsari da yake kai domin ci gaba da tsara tafiyar dimokuradiyyar kasa.
- Dalilin Kwararru Na Bukatar Kafa Cibiyoyin Bincike Kan Nau’ikan Dabbobi A Nijeriya
- Abin Da Ya Sa Ilimi Yake Da Muhimmanci Ga Rayuwar Al’umma (8)
Wannan na kunshe ne a cikin wata takarda dauke da sa hannun sakataren yada labarai na ALGON, Muhammad Lawal Shehu a ranar Juma’a 4 ga watan Yulin 2025.
Sanarwar ta kara da cewa, a lokacin da yake Sanata mai wakiltar Kaduna ta tsakiya, ya taka muhimmiyar rawa inda ya dauki nauyin kudirori masu muhimmanci wadanda suka karfafa tsaron kasa, inganta yaki da cin hanci da rashawa, da kuma sabunta muhimman tsare-tsare na doka.
Ta hanyar ba da fifikon ci gaban karkara, farfado da aikin noma, fadada hanyoyin samar da lafiya mai inganci, inganta rayuwar al’umma, da baiwa kananan hukumomi damar gudanar da ayyukansu yadda ya kamata, Gwamna Uba Sani ya nuna jagoranci mai hangen nesa wanda ke daukaka rayuwar al’umma a fadin jihar Kaduna.
ALGON reshen jihar Kaduna tana taya al’ummar jihar Kaduna da Nijeriya baki daya wajen murnar wannan gagarumin nasara da aka samu tare da addu’ar Allah ya kara basira da nasara a kan hidimar da yake yi wa jihar da kasa baki daya.
ADVERTISEMENT
