Ma’aikatar Baitulmalin Amurka ta sanar a ranar Litinin cewa za ta dakatar da takunkumin tattalin arziki da aka kakaba wa Iran na ɗan lokaci, domin bai wa ƙasar damar samarwa, sayarwa da kuma jigilar ɗanyen mai da sauran kayayyakin man fetur har zuwa ranar 21 ga Agusta, 2026.
A cewar sanarwar, duk wata mu’amala da a baya aka haramta wadda ta shafi samarwa, sayarwa ko jigilar ɗanyen man fetur daga Iran za ta kasance halastacciya har zuwa ƙarfe 12:01 na dare agogon Gabashin Amurka a ranar 21 ga Agusta, 2026.
Sakataren Baitulmalin Amurka, Scott Bessent, ya bayyana cewa an ɗauki wannan mataki ne saboda alƙawarin da Iran ta bayar a tattaunawar da ake yi tsakanin ƙasashen biyu.
A cewarsa, Iran ta amince da tabbatar da zirga-zirgar jiragen ruwa a mashigar ruwa ta Hormuz, tare da bai wa masu Binciken Makamashin Nukiliya (IAEA) damar shiga ƙasar domin gudanar da ayyukansu.
Matakin na zuwa ne yayin da ake ci gaba da ƙoƙarin sassauta rikicin da ya daɗe tsakanin Amurka da Iran, musamman kan batutuwan nukiliya, tsaro da harkokin makamashi.
Masana na ganin dakatar da takunkumin na ɗan lokaci na iya ƙara yawan man fetur a kasuwannin duniya, lamarin da zai iya taimakawa wajen rage tashin farashin mai da kuma sauƙaƙa matsin tattalin arziki a wasu ƙasashe.
