Kasashen duniya na bayyana rashin jin dadi game da sanarwar da sakantaren harkokin wajen kasar Amurka, Marco Antonio Rubio ya gabatar a ran 28 ga watan nan da muke ciki, wadda ta sanar da soke takardar biza ta karatu da kasar ta bai wa dalibai Sinawa. Game da wannan matakin dake yunkurin cimma buri na siyasa da bayyana bambanci, Sin ba za ta yarda ba, kuma za ta dauki matakan da suka wajaba don kiyaye halastaciyyar moriyar dalibanta dake Amurka.
Farfesa a kwalejin koyar da ilmin diflomasiyya na Sin Li Donghai ya ce, Amurka tana kara tsanantar da takara tsakaninta da Sin a halin yanzu, har al’ummar kasar suna fama da jayayyar al’adu. Hakan ya sa, ’yan siyasa kamar Rubio suna yunkurin yin gamin-gambiza da batun tsaron kasa wuri guda, don yin takara da kasar Sin da fakewa da batun dalibanta dake kasar, ta yadda za ta katse huldarta da Sin a bangaren kimiyya da musanyar al’adu da sauran bangarori, abun da zai taimaka wa matakin yin takara da Sin da cimma burin siyasa bisa radin kai.
Ba kasar Sin kadai ba, duk fadin duniya na fama da matsin matakin da gwamantin Amurka ke dauka a wannan karo. Tun daga watan Afrilun da ya gabata, gwamnatin Amurka ta sanar da soke takardar biza ta karatu na dalibai ko masu aikin koyarwa da masu aikin nazari daga kasa da kasa fiye da 529 a jami’o’i 88 na Amurka. An ba da labari cewa, majalisar gudanarwa ta kasar Amurka ta sanar da dakatar daliban ketare ko masu mu’ammalar al’adu daga neman bizar shiga kasar. Amma, kamar kalmomin da shugaban jami’ar Wesleyan Michael S. Roth ya fada, sabanin burin da gwamantin take sa ran cimmawa, za ta girba abin da ta shuka, domin matakin zai lalata moriyar Amurka.
Tarihi na shaida cewa, kasar dake da ainihin karfi ba ta rufe kofarta ko katse huldarta da ketare. Korar daliban ketare ciki har da dalibai Sinawa da katse huldar al’adu tsakaninta da sauran kasashe ba za su ba da ma’ana ba, sai kara lalata sunanta a duniya, da lahanta moriyarta. (Amina Xu)
