An bude bikin fina-finai na kasa da kasa na tsibirin Hainan karo na bakwai, a tsibirin Phoenix dake birnin Sanya na lardin Hainan a daren jiya Laraba, wanda babban rukunin gidajen rediyo da talabijin na Sin wato CMG da gwamnatin jama’ar lardin Hainan suka shirya tare.
Yayin bikin, mataimakin darektan kwamitin jam’iyyar kwaminis ta kasar Sin wato JKS na lardin Hainan kuma gwamnan lardin Liu Xiaoming, ya ba da jawabi tare da sanar da bude bikin. Kuma mataimakiyar shugaban CMG Xing Bo, ita ma ta gabatar da jawabi a yayin bude bikin.
A cikin jawabinsa, Liu Xiaoming ya ce, fina-finai na iya jan hankali da kuma bayyana ra’ayoyi. Ana fatan daukar bikin fina-finan a matsayin misali mai kyau, don ba da labarin Hainan da ma kasar Sin ta hanyar fina-finai, tare da nuna kyawun Hainan da Sin.
A nata bangaren, Xing Bo ta bayyana a cikin jawabinta cewa, CMG na son daukar wannan bikin fina-finai a matsayin wata dama ta kara amfani da fa’idodinsa, a matsayin dandalin sadarwa na kasa da kasa ta hanyar harsuna 85, da zurfafa hadin gwiwa da masu shirya fina-finai a fadin duniya, da kuma tattauna sabbin hanyoyi, da damammaki don hada fasahar fina-finai da shirye-shirye, da al’adu, da yawon bude ido, da kimiyya da fasaha da sauran fannoni.
Bikin fina-finai na kasa da kasa na tsibirin Hainan karo na 7, ya samu fina-finai 4,564 daga kasashe da yankuna 119, wanda hakan ya kafa wani sabon tarihi a tarihin bikin. (Safiyah Ma)
