Jam’iyyar APC a Jihar Jigawa ta dakatar da shugaban jami’iyyarta na karamar hukumar Roni, Alhaji Sale Idris, bisa zargin yi wa ‘yar shekara 14 fyade wanda hakan ya janyo ta samu ciki.
Dakatarwar wadda ta ke kunshe cikin wasikar da shugaban APC a jihar Hon Aminu Sani Gumel ya raba wa manema labarai a jihar, ta ce an dakatar da Sale ne, bisa zargin da ya sabawa sashe na 21.2 (7) da (X) na kundin tsarin mulkin APC na 2022 da aka sabunta.
Tinubu Ya Janye Nadin Dan Shekara 24 Matsayin Shugaban FERMA
Motar Gidan Yari Ta Afka Kan ‘Yan Kasuwa A Kwara
Kazalika, wasikar ta umarci Idris ya mika ragamar tafiyar jam’iyyar a karamar hukumar ga mataimakinsa.
Jami’an tsaron farin kaya na (NSCDC) ne suka kama Idris a ranar Laraba bayan da dan uwanta yarinyar ya kai korafi ofishinsu bisa zarginnsa da yi wa wata da ke yin aiki a gidansa ciki.
Ofishin NSCDC da ke Roni ya bayyana cewa, bayan an shigar da korafin a gabanta, Idris ya dauki alhakin zargin da ake yi masa, inda ya matsa sai dai a zubar da cikin.
