A ranar Juma’ar da ta gabata ne aka gudanar da bikin cika shekaru 55, da kulla diflomasiyyar kwallon tebur tsakanin Sin da Amurka. An gudanar da bikin ne a babban zauren wasanni na kasa dake birnin Beijing. Kuma babbar hukumar shirya wasanni ta kasar Sin, da babban gidajen radio da talabijin na kasar Sin ko CMG, da kungiyar yaukaka kawancen al’ummar kasar Sin da kasashen waje ne suka shirya bikin.
Shugaban kasar Sin Xi Jinping, ya aike da sakon taya murnar gudanar da bikin, cikin wata wasika da ya aike. A cikin jawabinsa yayin bikin, shugaban CMG Shen Haixiong, ya ce wasikar taya murna da shugaba Xi ya aike albarkacin bikin na wannan karo, ta samar da muhimmin jagoranci game da zurfafa kawance tsakanin Sin da Amurka, da ingiza musaya da hadin gwiwarsu, kuma za ta kara sa kaimi ga ci gaba da goyon bayan daidaito, da inganci, da dorewar bunkasar alakar sassan biyu.
A nata tsokacin kuwa, mataimakiyar shugaban kwamitin kasa mai lura da alakar Amurka da Sin Jan Berris, wadda ta halarci shirin musayar jama’a karkashin wasan kwallon tebur da aka gudanar shekaru 55 da suka gabata, fata ta yi cewa ruhin martaba juna, da abota dake cikin diflomasiyyar kwallon tebur, zai taimaka wajen karfafa daidaito, da martaba juna a alakar kasashen biyu. Kazalika, hakan zai haifar da moriya ga al’ummun sassan biyu, tare da bayar da gudunmawa ga wanzuwar zaman lafiya da ci gaban duniya baki daya. (Saminu Alhassan)
