An gudanar da bikin bude taron kasa da kasa na kafofin watsa labarai karo na 7 a jiya Asabar a nan birnin Beijing, bisa taken “Kafofin watsa labarai a zamanin basira: Daga cimma matsaya zuwa aiki.”Kamfanin dillancin labarai na kasar Sin Xinhua, da gwamnatin birnin Beijing ne suka yi hadakar shirya taron, wanda zai gudana tun daga ranar Alhamis 5 ga wata zuwa gobe Litinin 9 ga watan nan na Nuwamba.
Taron ya hallara wakilai kusan 500 daga manyan kafofin watsa labarai kimanin 330, da kwararru, da sassan gwamnatocin kasashe da yankunan duniya 112, da ma jamian MDD da sauran wasu hukumomin kasa da kasa.
An amince da matsaya daya ta taron karo na 7 a yayin bikin bude shi, matsayar da ta yi kira da a kara azamar bunkasa sauya akala, da kafa masanaantar watsa labarai da shirye-shirye mai nagarta a zamanin AI.
Kazalika, matsayar ta amince da karuwar tasirin fasahar AI a harkar ci gaban ayyukan kafafen watsa labarai, kana za ta mara baya ga bunkasa amfani da fasahar AI bisa dacewa, wadda za ta zamo mai game dukkanin sassa a ayyukan bangarorin watsa labarai da shirye-shirye, ta yadda ci gaban fasahar zai amfani dukkanin sassan a kowane mataki na ci gaba, kuma a ko wace kasa. (Saminu Alhassan)
