Shugaban Ƙasa Bola Tinubu zai ƙaddamar da sashin layin dogo mai tsawon kilomita 190 daga Jaji zuwa Kano, wanda aka kammala a matsayin wani ɓangare na aikin layin dogon Kaduna–Kano, a ranar 3 ga Disamba, 2026. Dele Alake, mai magana da yawun Kwamitin Yaƙin Neman Zaɓen Shugaban Ƙasa na APC, ne ya bayyana hakan cikin wata sanarwa da ya fitar ranar Lahadi, 8 ga Nuwamba.
Alake ya ce aikin layin dogon mai tsawon kilomita 203 ya kai kusan kashi 90 cikin 100 na kammalawa. Layin dogon Kaduna–Kano ƙari ne ga layin dogo mai amfani da ma’auni na zamani (standard gauge) da ya haɗa Abuja da Kaduna. Idan aka kammala shi gaba ɗaya, zai haɗa Abuja, Kaduna, Zariya da Kano, tare da samar da wata hanyar sufuri ta daban a kan muhimmin hanyar kasuwanci da ke Arewacin Nijeriya.
Ya kuma bayyana cewa aikin layin dogon Kano–Katsina–Maradi mai tsawon kilomita 400 ya kai kashi 70 cikin 100 na kammalawa. A cewarsa, wata tawagar gwamnatin tarayya ƙarƙashin jagorancin Funso Adebiyi, Babban Sakataren Ma’aikatar Sufuri ta Tarayya, ta gudanar da rangadin duba ayyukan biyu bisa umarnin Shugaba Tinubu.
Alake ya ce tawagar ta nuna gamsuwa da ingancin aikin, musamman yadda aka shimfiɗa gwadaben, da magudanan ruwa, da kariyar tudu, da shimfiɗar ƙananan duwatsu da kuma matakan ƙarfafa ƙasa. Tawagar ta kuma yi gwajin tafiya a jirgin ƙasan daga Jaji a Jihar Kaduna zuwa Kano domin tantance ingancin layin da aka kammala da kuma jin daɗin fasinjoji yayin tafiya.
Ya ƙara da cewa Tinubu ya bayar da umarnin warware matsalolin rikicin mallakar filaye da biyan diyya da suka rage a cikin birnin Kaduna cikin gaggawa, domin a samu damar kammala hanyar layin dogon da za ta haɗa Abuja da Kano.
Haka kuma, za a ƙaddamar da sashin aikin layin dogon Kano–Maradi mai tsawon kilomita 250, daga Dawanu zuwa Kano, Kazaure, zuwa Daura da Katsina, a ranar 3 ga Disamba.
