Wasu ƴan kasuwa a Abuja sun fara mayar da hankali kan sayar da kayayyaki ta intanet sakamakon hauhawar kuɗin hayar shaguna da tsadar gudanar da harkokin kasuwanci. Wannan mataki na zuwa ne yayin da masu sana’o’i ke ƙoƙarin rage kuɗaɗen da suke kashewa domin ƙarin riba.
Rahoton jaridar Punch ya nuna cewa tsadar haya a wasu manyan wuraren kasuwanci na babban birnin tarayya ta sa wasu ƴan kasuwa rage girman shagunan da suke haya, yayin da wasu kuma suka koma gudanar da kasuwancinsu daga gidajensu ko ta kafafen sada zumunta. Hakan na ba su damar kai kaya ga kwastomomi ba tare da biyan kuɗin hayar shago mai tsada ba.
Wasu daga cikin ƴan kasuwar sun bayyana cewa sayarwa ta intanet na taimaka musu wajen rage kuɗaɗen haya, da wutar lantarki da sauran kuɗaɗen kula da shaguna. Sai dai sun ce tsarin na da nasa ƙalubalen, ciki har da tsadar jigilar kaya, da rashin amincewar wasu kwastomomi da sayen kaya ba tare da ganin su ba, da kuma matsalar karɓar kuɗi.
Masu lura da harkokin kasuwanci sun nuna cewa sauyin da ake samu na ƙara nuna yadda tsadar rayuwa da hauhawar kuɗaɗen gudanar da sana’o’i ke tilasta wa ƙananan ƴan kasuwa sauya dabarun kasuwancinsu. Kasuwancin intanet na kuma zama wata hanya ta ci gaba da hulɗa da kwastomomi duk da ƙalubalen da ake fuskanta a kasuwannin gargajiya.
Duk da haka, wasu ƴan kasuwa na ganin cewa haɗa shagunan zahiri da sayarwa ta intanet shi ne mafita mafi dacewa, domin hakan zai ba su damar isa ga kwastomomi daban-daban tare da rage dogaro da hayar shaguna masu tsada.
