Hukumar Zaɓe Mai Zaman Kanta ta Ƙasa (INEC) ta ce za ta gudanar da taro a mako mai zuwa domin nazarin tasirin hukuncin Babbar Kotun Tarayya da ta soke shugabancin jam’iyyar ADC ƙarƙashin jagorancin Sanata David Mark, ciki har da batun zaɓen tsohon Mataimakin Shugaban Ƙasa, Atiku Abubakar, a matsayin ɗan takarar shugaban ƙasa na jam’iyyar a zaɓen 2027.
Shugaban Kwamitin Yaɗa Labarai da Ilimantar da Masu Zaɓe na INEC, Mohammed Haruna, ne ya bayyana hakan ranar Lahadi. Ya ce hukumar ba za ta yanke matsaya kan rikicin shugabancin ADC ba har sai ta samu kwafin hukuncin kotun da aka tabbatar da sahihancinsa (Certified True Copy), domin ba za ta dogara da rahotannin kafafen yaɗa labarai wajen fassara hukuncin ba.
Hukuncin da Mai Shari’a Peter Lifu ya yanke a Abuja ranar Alhamis, 5 ga Nuwamba, 2026, ya soke shugabancin kwamitin riƙon ƙwarya na David Mark tare da rushe matakan da kwamitin ya ɗauka. Hakan ya haɗa da zaɓen fidda gwani da ya samar da Atiku a matsayin ɗan takarar shugaban ƙasa na ADC, da kuma naɗin Rauf Aregbesola a matsayin sakataren jam’iyyar na ƙasa.
Shari’ar ta samo asali ne daga ƙarar da tsohon Mataimakin Shugaban ADC na Arewa maso Gabas, Nafiu Bala Gombe, ya shigar, inda ya ƙalubalanci yadda David Mark da sauran mambobin kwamitin riƙon ƙwarya suka karɓi shugabancin jam’iyyar. Gombe ya yi iƙirarin cewa bayan murabus ɗin tsohon shugaban jam’iyyar, Ralph Nwosu, kundin tsarin mulkin ADC ya ba shi damar karɓar ragamar shugabancin.
Haruna ya ce INEC za ta tattauna batun a taronta na mako mai zuwa, kuma za ta bi duk wani sabon umarnin kotu idan ɓangaren David Mark ya ɗaukaka ƙara tare da samun umarnin dakatar da aiwatar da hukuncin. A halin yanzu, hukuncin kotun ya jefa shakku kan sahihancin tikitin Atiku da sauran ƴan takarar da aka tsayar ƙarƙashin shugabancin da aka soke.
