Yau Laraba, babban kamfanin rukunin makamashi na kasar Sin wato CHN ENERGY, ya bayyana kammala aikin gina wani yankin samar da wutar lantarki da sarrafa makamashin Hydrogen, da adana makamashi tare, a gundumar Rudong dake lardin Jiangsu na kasar Sin.
Kamfanin ya ce yankin wanda kamfanin zuba jari kan makamashi na Guohua ya zuba jarin ginawa, ya kasance aiki mafi girma a kasar Sin, wanda ya hade ayyukan samar da wutar lantarki, da samar da makamashin Hydrogen, da kuma adana makamashi tare, ta hanyar amfani da hasken rana a kan teku.
An gina wannan yanki ne a kusa da tekun gundumar Rudong ta lardin Jiangsu, kuma zai iya adana wutar lantarki har kilowatts dubu 400, kana, an kafa wata sabuwar tashar kara karfin wuta da kilowatts 220, da wata tashar samar da makamashin Hydrogen, wadda a duk sa’a, za ta iya samar da makamashin Hydrogen har kyubik mita 1500, da kuma wata tashar adana makamashi da batira.
A matsayin muhimmin aiki da ya hade sassan samar da wutar lantarki, da samar da makamashin Hydrogen da adana makamashi tare, kuma irinsa na farko, an tsara hade wannan aiki da cimma gajiyar albarkatun teku, da daidaita muhallin kewayen teku na kasar Sin. Haka zalika, aikin ya haifar da nasarar cin gajiyar wutar lantarki, da makamashin Hydrogen ta hanya mafi inganci. (Mai Fassara: Maryam Yang)
