Gwamnatin Nijeriya ta samu nasarar yanke wa mutane 2,512 hukunci a shari’o’in da suka shafi ta’addanci a cewar Cibiyar Yaƙi da Ta’addanci ta Ƙasa (NCTC).
Mai kula da cibiyar, Manjo Janar Adamu Laka ne, ya bayyana hakan a Abuja ranar Talata yayin gabatar da sakamakon shari’o’in ta’addanci karo na 11.
Ya ce an saurari ƙararraki 1,069 tsakanin 15 zuwa 24 ga watan Oktoba.
Daga cikin waɗanda aka gurfanar, an yanke wa mutum 791 hukunci, yayin da aka wanke mutum bakwai.
Laka ya ce gwamnati ta mayar da hankali wajen hukunta mutanen da ƙungiyoyin da ke taimaka wa ’yan ta’adda ta hanyar ba su kuɗaɗe, kayan aiki da sauran tallafi.
Ya bayyana cewa an kuma saurari kararraki 201 da suka shafi samar da kuɗaɗen gudanar da ayyukan ta’addanci a wannan karo.
A nasa ɓangaren, Ofishin Mai Bai wa Shugaban Ƙasa Shawara Kan Harkokin Tsaro (ONSA) ya yi gargadin cewa duk wanda ya san yana taimaka wa ’yan ta’adda zai iya fuskantar hukunci, ko da kuwa ba da shi aka kai hare-haren ba.
Daraktan Sashen Shari’a na ONSA, Zakari Mijinyawa, ya ce dokar ƙasar ta tanadi zaman gidan yari na aƙalla shekaru 20 ga duk wanda ya taimaka wa ayyukan ta’addanci.
Ya buƙaci ’yan Nijeriya su fahimci tanade-tanaden dokar, yayin da jami’an gwamnati suka tabbatar da cewa za a bai wa duk wadanda ake tuhuma damar samun shari’a ta gaskiya da kuma wakilcin lauya.
