Tsohon Mataimakin Shugaban Ƙasa kuma ɗan takarar shugaban ƙasa na jam’iyyar ADC, Atiku Abubakar, ya sake yin kira da a gaggauta sakin tsohon Gwamnan Jihar Kaduna, Nasir El-Rufai, da wasu mutane.
Atiku ya yi wannan kiran ne ranar Laraba, lokacin da ya karɓi shugabannin ADC na Jihar Kaduna a gidansa da ke Abuja.
Ya ce bai kamata Gwamnatin Tarayya ta ci gaba da tsare mutane saboda ra’ayinsu na siyasa ko alaƙarsu da wasu jam’iyyu ba.
Atiku ya kuma ce Kaduna za ta kasance muhimmiyar jiha ga ADC a zaɓen 2027, yana mai cewa jam’iyyar na son samun nasara a jihar.
A nasa jawabin, Shugaban Kwamitin Yaƙin neman Zaɓen Shugaban Ƙasa na ADC, Kashim Imam, ya ce Kaduna ce ke kan gaba wajen rajistar sabbin mambobin jam’iyyar da ake gudanarwa a faɗin ƙasar.
Imam ya buƙaci shugabannin jam’iyyar a Kaduna su mayar da yawan mambobin da suka samu zuwa ƙuri’u, yana mai cewa suna sa ran samun aƙalla ƙuri’a miliyan ɗaya a takarar shugaban ƙasa a 2027.
Ɗan takarar gwamnan Kaduna na ADC, Isah Ashiru, ya kuma bayyana ƙwarin gwiwarsa cewa jam’iyyar za ta samu nasara a zaɓen gwamna da sauran zaɓukan da za a gudanar a jihar.
