Gwamnatin tarayya ta ayyana ranakun Laraba, da Alhamis, Disamba, 25 da 26, 2024, da kuma Laraba 1 ga Janairu, 2025, a matsayin ranakun hutu domin bukukuwan Kirsimeti, Boxing da kuma sabuwar shekara.
Ministan harkokin cikin gida, Dakta Olubunmi Tunji-Ojo, wanda ya bayyana hakan a madadin gwamnatin tarayya a safiyar ranar Litinin, ya mika sakon taya murna ga daukacin al’ummar Nijeriya, inda ya bukace su da su yi amfani da lokacin bukukuwan wajen yin tunani a kan kimar soyayya, zaman lafiya, da hadin kai da wannan ranakun ke nunawa.
- Me Ficewar Kasashen Sahel Daga Ecowas Ke Nufi?
- Kirsimeti: Ugochinyere Ya Yaba wa Kyari, Dangote, da NMDPRA Kan Wadatuwar Man Fetur
Tunji-ojo, a cikin wata sanarwa mai dauke da sa hannun babban sakataren ma’aikatar, Dakta Magdalene Ajani, ta kara jaddada muhimmancin wannan ranakun na bana a matsayin lokacin da za a samar da zaman lafiya da karfafa zumunci a tsakanin iyalai da al’umma.
Ministan ya kuma taya kiristoci da daukacin ‘yan Nijeriya mazauna gida da na kasashen waje murnar zagayowar wannan rana.
Dokta Tunji-Ojo ya hori Kiristoci da su yi koyi da rayuwar Yesu Kiristi a cikin ayyukansa da koyarwarsa ta kankan da kai, hidima, tausayi, da haƙuri.
Ya jaddada cewa, zaman lafiya da tsaro sune muhimman abubuwan da ake bukata don bunkasa tattalin arziki da wadata.
