Kasar Sin ta yi nasarar harba rokar dakon kaya samfurin Long March-10B a cibiyar harba rokoki ta Wenchang da ke lardin Hainan na kudancin kasar Sin a yau Jumma’a, inda ta cimma nasarar dawo da sashe na farko na rokar dakon kaya da ake iya sarrafa dawowarta doron kasa.
Rokar, wadda aka harbe ta a karon farko, ta aika da kayan da ta yi dako zuwa da’irar sararin samaniya da aka tsara.Bayan rabuwar sashe na farko da na biyu na rokar, sashe na farko ya dawo doron kasa inda aka yi nasarar cafke shi a kan wani dandamali na ruwa ta hanyar amfani da wani tsarin na’ura na raga. Duka an kammala aikin harbawa da kuma dawo da sashen na farko cikin nasara.
Wannan aiki ya nuna nasarar farko da kasar Sin ta samu wajen dawo da sashen farko na rokar dakon kayan da ake iya sarrafa dawowarta, wanda hakan ya fayyace babban sabon ci gaba da aka samu a bangaren fasahar kasar ta iya sake amfani da roka. (Abdulrazaq Yahuza Jere)
