Hukumar kwastam ta birnin Urumqi, ta sanar a Juma’ar nan cewa a shekarar 2025, darajar cinikayyar waje ta jihar Xinjiang ta Uygur mai cin gashin kai, dake arewa maso yammacin kasar Sin, ta kai yuan biliyan 520.37, kwatankwacin dalar Amurka biliyan 74.4, karuwar da ta kai kaso 19.9 bisa dari a mizanin shekara-shekara, adadin da ya haura yuan biliyan 500 a karon farko a tarihin jihar.
Hukumar ta kwastam, ta ce hakan na da alaka da jerin manufofin da aka aiwatar don bunkasa cinikayyar waje. Da tsarin biyan kudade don sayayyar hajojin da ake fitarwa zuwa sassan kasa da kasa ta amfani da intanet, wanda ya karu da kaso 232.8 bisa dari, da hada-hadar shigo da hajoji ta cinikayya tsakanin al’ummun dake kusa da kan iyakoki wadda ta karu da kaso 68.5 bisa dari.
Kazalika, jihar Xinjiang na fadada hadin gwiwar kasa da kasa karkashin shawarar ziri daya da hanya daya ko BRI, wanda hakan ya yi matukar taimakawa, ta yadda darajar yawan hada-hadar cinikayya karkashin tsarin cudanya da kasashen kawancen BRI, ya kai yuan biliyan 458.37, adadin da ya karu da kaso 14.7 bisa dari. (Mai fassara: Saminu Alhassan)
