An yanke wa fitaccen daraktan finafinan Amurka, Carl Rinsch hukuncin ɗaurin watanni 30 a Gidan gyaran hali, bayan an same shi da laifin damfarar kamfanin wallafa fina-finai na Netflix miliyoyin daloli, masu gabatar da ƙara a birnin New York ne suka bayyana hakan a ranar Litinin, Carl ya samu ɗaukaka a fagen fim tun bayan bayar da umurni a fim ɗin ’47 Ronin’ da yayi a shekarar 2013, kamar yadda mujallar FIM ta ruwaito.
Tun a bara ne aka samu Rinsch da laifin karkatar da dala miliyan 11 da kamfanin Netflix suka ba shi a shekarar 2020 domin samar da fim mai dogon zango kan kimiyyar ƙirƙira inji cewar lauyan Gwamnatin tarayya dake Kudancin New York, Jay Clayton, ya ƙara da cewa “Maimakon ya yi amfani da kuɗin wajen shirya fim ɗin, sai Rinsch ya saka su cikin hada-hadar sayen hannayen jari masu matuƙar haɗari da kuma kasuwancin kirifto (cryptocurrency), sannan ya kashe miliyoyin daloli wajen sayen kayayyakin alatu domin amfanin kansa”.
An yi zargin cewa yana samun kuɗaɗen sai ya shiga bushasha abin sa, ya sayi kayayyaki da suka haɗa da tufafın alfarma, kayan ɗaki masu tsada, mota kirar Ferrari, da kuma motoci biyar ƙirar Rolls-Royce, baya ga hukuncin ɗaurin shekara biyu da rabi da aka yanke masa, kotun ta kuma umurci Rinsch, mai shekara 48, da ya mayar da dala miliyan 11 ga Netflix ɗin.
Lauyoyinsa sun roƙi kotu da ta sassauta masa hukuncin, suna masu cewa karkatar da kuɗin ya faru ne sakamakon matsin lambar da yake fuskanta a aikinsa da kuma rikicin mutuwar aurensa, koda yake masu gabatar da ƙarar ba su ambaci sunan Netflix kai-tsaye ba, a baya an ruwaito cewa Rinsch ya shiga taƙaddama da kamfanin kan wani fim mai dogon zango da aka fara sanya wa suna ‘White Horse’, amma daga baya aka canja sunan zuwa ‘Conxuest’.
Bisa ga takardun kotu, an tsara labarin fim ɗin mai dogon zango ne kan wani masanin kimiyya da ya ƙirƙiri wasu na’urori (clones) masu ƙarfi, waɗanda aka kora zuwa wani yanki a ƙasar Brazil, a can ne za a ga sun fara haɓaka tare da fara rikici da mutane da kuma tsakanin su, shi dai Rinsch, ya fara shahara ne a matsayin daraktan babban fim ɗin ’47 Ronin’, wanda fitaccen jarumi Keanu Reeɓes ya jagoranta, kafin a yanke masa hukunci, Reeɓes ya rubuta wa alƙalin kotun wasiƙa yana roƙon a yi wa tsohon daraktan nasa sassauci, yana mai bayyana shi a matsayin “ƙwararren mai fasaha” wanda ya jefa kan sa cikin halin ƙaƙa-ni-ka-yi.
