A kwanakin baya, mujallar “The Economist” ta wallafa sharhi game da wani fim na kasar Sin, mai taken “Barka da Zuwa Gidan Abinci na Dragon”, inda ta fassara diplomasiyyar kasar Sin a matsayin diplomasiyya irin ta wannan fim. Sharhin ya bayyana ra’ayin marubucinsa game da wannan batu, wanda ya sabawa hakikanin ra’ayin diplomasiyyar kasar Sin.Bisa jigon wannan fim, wato cin abinci da ciyar da yara yadda ya kamata, sharhin ya mayar da diplomasiyyar kasar Sin wani abu mai nasaba da cimma moriyar cinikayya, da kuma rashin zurfin dangantaka.
Wannan ra’ayi ya sauya ma’anar aiki mai matukar amfani zuwa mai gajarta, da mayar da samun ci gaba matsayin ra’ayin yin cinikayya kawai, da kuma mayar da burin fararen hula a matsayin gazawa wajen samun burin siyasa. Alal hakika, fim din ba ya nufin abinci ya maye gurbin diplomasiyya, ya kuma gabatar da wata tambaya, wato mene ne zaman lafiya da ci gaba, me ya sa ake yin hadin gwiwa a tsakanin kasa da kasa, dukkansu manyan batutuwa ne da ya kamata a tattauna a harkokin siyasa na kasa da kasa.
Kasar Sin ta dora muhimmanci sosai kan bunkasar tattalin arziki, kuma hakan yana da muhimmanci sosai ga wata kasa wadda ta taba fuskantar yanayin talauci a dogon lokaci, ta kuma yi kokari har ta zamo babbar kasa ta biyu a fannin karfin tattalin arziki a duniya. Wannan batu ya nuna cewa, kasar Sin tana da ra’ayinta na musamman dangane da daidaita huldar dake tsakanin kasa da kasa, wato ci gaba ba ya nufin ma’aunin tattalin arziki kadai, maimakon hakan, ya kasance tushen kwanciyar hankalin al’umma, da mutunta dan Adam da kuma samar da ‘yancin kan kasa.
Ga kasashe masu tasowa da dama, muhimmin batu ba tunanin siyasa ba ne, maimakon haka batun dake kan gaba shi ne ko akwai wutar lantarki a gida, ko yara suna makaranta, ko ana iya sayar da amfanin gona, ko asibiti na aiki yadda ya kamata, ko akwai ruwa mai tsabta, da ko ana iya gyara hanyoyin mota bayan bala’i. Idan wani ya kalli wadannan batutuwa a matsayin marasa kima a siyasance, to tabbas, tunaninsa ne mafi gajarta ta fuskar siyasa. (Zainab Zhang)
