Gwamnan Jihar Katsina, Dikko Radda, ya gabatar da kasafin kuɗin shekarar 2027 na Naira biliyan 828.64 a gaban Majalisar Dokokin jihar domin nazari da amincewa.
Kasafin, mai taken “Building Your Future IV”, ya ware Naira biliyan 637.91, kwatankwacin kashi 76.98 cikin 100, domin ayyukan raya ƙasa, yayin da aka ware Naira biliyan 190.73, wato kashi 23.02, domin bukatun yau da kullum.
Kasafin na 2027 ya yi ƙasa da wanda aka amince da shi na shekarar 2026 da Naira biliyan 69.23, lamarin da Gwamna Radda ya ce ya samo asali ne daga yin hasashen da ya fi dacewa da ainihin yanayin kuɗaɗen shiga da bukatun jihar.
Da yake gabatar da kasafin a gaban ’yan majalisar, gwamnan ya ce gwamnatinsa ta bi tsarin tsantseni, taka tsan-tsan wurin kashe kuɗi da kuma yin hasashe na zahiri wajen tsara kasafin.
Ya ce an buƙaci ma’aikatu, hukumomi da sassan gwamnati su bayyana dalilan kashe-kashen da suka gabatar, bisa la’akari da kuɗaɗen da ake da su da kuma shirin raya jihar na gwamnatin.
Radda ya ce gwamnati ta duba duk hanyoyin samun kuɗaɗen shiga domin tabbatar da daidaiton kasafin, inganta aiwatar da ayyuka da kuma rage yiwuwar fuskantar gibin kuɗi.
