Farashin danyen mai a kasuwannin duniya ya fadi kasa da dala 80 kan kowace ganga a ranar Talata, sakamakon kyakkyawan fata da aka samu kan sake bude mashigar ruwa ta Hormuz, lamarin da ake sa ran zai rage matsin tattalin arziki da hauhawar farashi a kasashen duniya.
Farashin danyen mai na Brent, wanda ake amfani da shi a matsayin ma’aunin farashin mai na duniya, ya ragu da kashi 4 cikin 100 zuwa dala 79.87 kan kowace ganga, inda ya sauka kasa da dala 80 a karon farko tun farkon watan Maris kafin daga bisani ya dan farfado.
Haka kuma, farashin danyen mai na Amurka, West Texas Intermediate (WTI), ya ragu da kashi 4.7 cikin 100 zuwa kasa da dala 77 kan kowace ganga.
Shugaban Amurka, Donald Trump, ya bayyana cewa mashigar ruwa ta Hormuz za a “bude ta gaba ɗaya” bayan Amurka da Iran sun sanya hannu kan yarjejeniyar zaman lafiya da aka shirya yi ranar Juma’a a ƙasar Switzerland.
Rahotannin kafafen yaɗa labarai na Iran sun ce tuni tankokin dakon mai guda uku da kuma jiragen dakon kaya guda biyu suka ratsa ta mashigar ruwan.
Sai dai duk da faduwar farashin, ’yan kasuwa da masu zuba jari na ci gaba da sanya ido kan yiwuwar Iran ta kakaba wasu kuɗaɗen amfani da hanya ga jiragen ruwa da ke wucewa ta mashigar Hormuz, wadda ke da muhimmanci wajen jigilar mai zuwa sassa daban-daban na duniya.
