Gwamnan Jihar Ribas, Siminalayi Fubara, ya janye daga zaɓen fidda gwani na jam’iyyar APC domin takarar gwamna a jihar.
Fubara ya bayyana hakan ne cikin wata sanarwa da ya fitar a ranar Laraba, inda ya ce ya ɗauki matakin ne domin tabbatar da zaman lafiya, haɗin kai da kwanciyar hankali a Jihar Ribas.
Gwamnan ya bayyana cewa janyewar tasa ba alamar tsoro ba ce ko gazawa, illa wani mataki na sadaukarwa domin bai wa jihar damar ci gaba cikin zaman lafiya.
Ya ƙara da cewa Jihar Ribas na buƙatar zaman lafiya a wannan lokaci, kuma ya kamata shugabanni su fifita muradun al’umma fiye da buƙatun kansu.
A cewarsa, matakin da ya ɗauka zai taimaka wajen rage zafin siyasa a jihar.
Fubara ya kuma tabbatar wa al’ummar jihar cewa zai ci gaba da yi musu hidima har zuwa ƙarshen wa’adinsa.
Ya gode wa magoya bayansa bisa goyon bayan da suke ba shi tare da kira gare su da su ci gaba da mara wa zaman lafiya da ci gaban jihar baya.
