Aƙalla mutane 111 ne suka mutu bayan wata girgizar ƙasa mai ƙarfi ta afku a yammacin ƙasar Colombia.
Girgizar ƙasar, mai ƙarfin maki 7.4, ta afku da safiyar ranar Litinin, inda ta haifar da rushewar gine-gine tare da jikkata mutane da dama.
Gwamnatin Colombia ta ayyana dokar ta-ɓaci bayan faruwar girgizar ƙasar, yayin da jami’an hukumomin aikin ceto ke ci gaba da neman mutanen da suka maƙale a ƙarƙashin baraguzan gine-gine.
Shugaban ƙasar, Abelardo de la Espriella, ya ce gwamnati ta tura dukkanin hukumomin da suka dace domin ceto rayuka da taimaka wa mutanen da abin ya shafa.
Rahotanni sun ce mutane 87 sun jikkata, yayin da sama da gine-gine 1,000 suka samu matsala sakamakon girgizar ƙasar.
Girgizar ta fi yin ɓarna a wasu birane da yankunan yammacin ƙasar, ciki har da Pereira, Cali, Manizales da Quibdó.
A Pereira, ɗaya daga cikin wuraren da abin ya fi shafa, jami’an aikin ceto na ci gaba da aikin kwashe mutane daga baraguzan gine-ginen da suka ruguje.
A birnin Manizales ma, wani ɓangare na hasumiyar wata tsohuwar coci ya ruguje sakamakon girgizar ƙasar.
A Cali, an ce gine-gine kusan 20 sun ruguje, inda ake fargabar cewa wasu mutane na iya kasancewa a ƙarƙashin baraguzan gine-gine.
Girgizar ta kuma shafi wasu sassan ƙasashen Ecuador, Panama da Venezuela, yayin da aka kwashe mutane daga wasu gine-gine a babban birnin Colombia, Bogotá.
Hukumomi sun dakatar da ayyukan wasu ƙananan filayen jiragen sama a yammacin Colombia saboda girgizar ƙasar.
Ƙasashe da ƙungiyoyin ƙasa da ƙasa sun fara aike da alhininsu ga Colombia.
Amurka da Tarayyar Turai sun ce a shirye suke su taimaka wajen ayyukan agajin gaggawa.
A halin yanzu, jami’an aikin ceto na ci gaba da neman waɗanda suka maƙale a ƙarƙashin baraguzan gine-gine, yayin da ake sa ran adadin waɗanda suka mutu ko suka jikkata zai iya ƙaruwa.
