A halin yanzu, ana hanzarta yiwa tsarin cinikayyar tattalin arzikin kasa da kasa kwaskwarima, kuma cinikin hada-hadar ba da hidima tana kara karfin jagorantar ci gaban tattalin arziki. Kididdiga na nuna cewa, karuwar cinikin hada-hadar ba da hidima ta duniya ta kai kashi 65% bisa na jimillar cikin tattalin arzikin duniya, kuma ta wuce kwata daya bisa na jimillar cinikayyar duniya.
A bana kasar Sin ta fara aiwatar da shirin ci gaban tattalin arziki da zamantakewar al’ummarta na shakaru biyar-biyar karo na 15, kuma “Rahoton Aikin Gwamnatin Sin” ya mai da aikin “fadadawa da inganta masana’antar ba da hidima”, a matsayin daya daga cikin muhimman ayyuka a wannan shekarar da muke ciki.
Duba da hakan, bikin baje kolin cinikin hada-hadar ba da hidima na kasa da kasa ta Sin wato CIFTIS na shekara ta 2026, wanda aka gudanar daga ranar 9 zuwa 13 ga watan nan ya samu ci gaba mai armashi, kasashe da kungiyoyin kasa da kasa 90 sun shirya baje koli da tarurruka, kamfanoni sama da 400 na manyan kamfanonin duniya dake sahun gaba 500, da manyan kamfanonin masana’antu sun halarci bikin, an cimma sakamako iri-iri sama da 1200.
Babban manajan babban yankin Sin na hukumar cinikayya da zuba jari ta Australiya, kuma karamin jakadan kasuwanci na ofishin jakadancin Australiya a Sin, Dominic Trindade, wanda ya halarci bikin sau da yawa, ya bayyana cewa, a halin yanzu duniya tana fuskantar kalubale a mabambantan matakai, bikin ya bai wa kasashe daban-daban kyakkyawan dandamali na musayar ra’ayi da hadin gwiwa, kuma ya taimaka sosai wajen cin moriyar juna.
A cikin shekaru 5 masu zuwa, kasar Sin za ta fadada bude kasuwanninta a wurare daban-daban musamman a fannin cinikin hada-hadar ba da hidima. Ta hanyar wannan bikin, duniya ta ga damammakin hadin gwiwa mafi fadi. Manyan jami’ai da dama na kamfanonin kasa da kasa sun yi imanin cewa, a nan gaba kasar Sin za ta kara bude kofofinta ga kamfanonin ketare a fannoni da yawa, tare da ba su sabbin damammaki da sabbin hanyoyi na habaka ayyukansu a kasar Sin. (Amina Xu)
