An bizne gawar sarki Ohinoyi na kasar Ebira, Alhaji Ado Ibrahim a yammacin Lahadi a mahaifarsa, Okene, jihar Kogi.
An bizne gawar ne kamar yadda addinin Musulunci ya tanada da misalin karfe 8:40 na dare.
- An Gudanar Da Taron Tattaunawa Kan Raya Shawarar Ziri Daya Da Hanya Daya Tsakanin Sin Da Girka
- Da Ɗumi-ɗuminsa: Mai Martaba Ohinoyi na Kasar Ebira Ya Rasu
Gwamna Bello na jihar, ya mika ta’aziyyarsa ga iyalan Sarkin yayin da ya kai ziyara zuwa kabarin mamacin, kuma ya yi Addu’a Allah ya gafarta wa sarki Ohinoyi kurakuransa.
LEADERSHIP ta rahoto cewa, sarkin mai daraja ta daya ya rasu a safiyar Lahadi a wani asibiti mai zaman kansa da ke Abuja.
Sakataren masarautar Ebira, Alhaji Salihu Sule, ya bayyana cewa ba a samu damar yin jana’izar ba da safiyar ranar, saboda kalubalen da aka fuskanta, inda ya ce, gawar ta bar Abuja a makare, sai da misalin karfe 6:45 na yamma ta isa Okene.
Sheik Salihu Ebere, babban limamin kasar Ebira wanda ya jagoranci jana’izar, ya yi addu’ar Allah ya jikan marigayi Ohinoyi, ya kuma gafarta wa sarkin kurakuransa.
