Hukumar karɓar haraji ta ƙasa (NRS) ta ƙaryata wani hoto da ke yawo a kafafen sada zumunta da ke iƙirarin cewa gwamnatin tarayya ta ƙaddamar da sabon haraji kan motoci daga ranar 1 ga Yuli, 2026, tana mai cewa bayanin ƙarya ne kuma an yi shi ne don yaudarar jama’a.
Hukumar ta bayyana cewa hoton da ke yawo ya umarci masu motoci su biya wani haraji ta yanar gizo ko a bankuna, duk da cewa bai bayyana ƙimar harajin ba, kuma ba shi da sahihin tushen inda ya fito ko marubuci. An kuma lura cewa an saka tambarin gwamnati domin ya yi kama da sahihi.
A cikin wata sanarwa, mai magana da yawun hukumar, Dare Adekanmbi, ya ce wannan bayani bai fito daga NRS ko wata hukuma ta gwamnati ba. Ya gargaɗi jama’a da su yi watsi da irin waɗannan saƙonni na ƙarya da ake yaɗawa domin ruɗar da mutane.
Hukumar ta shawarci al’umma da su riƙa dogaro da sahihan hanyoyin sadarwa na gwamnati kawai, ciki har da shafin intanet na hukumar da kuma asusun sada zumunta, domin samun ingantattun bayanai kan manufofi da harkokin haraji.
